30 ਨਵੰਬਰ (ਐਤਵਾਰ) ਸੇਵਾ ਮੁਕਤੀ ‘ਤੇ ਵਿਸ਼ੇਸ਼ : ਜਲੰਧਰ ਦੂਰਦਰਸ਼ਨ ਤੇ ਸਮਾਜਿਕ ਸੇਵਾਵਾਂ ਦੀ ਬਹੁ-ਗੁਣੀ ਸਖਸ਼ੀਅਤ-ਇੰਜ਼: ਨਰਿੰਦਰ ਬੰਗਾ

     

ਕੋਈ ਵੀ ਇਨਸਾਨ ਆਪਣੀ ਯੋਗਤਾ ਜਾਂ ਨੌਕਰੀ ਕਰਕੇ ਵੱਡਾ ਨਹੀਂ ਹੁੰਦਾ ਸਗੋਂ ਜਿਸ ਵਿਅਕਤੀ ਨੂੰ ਸਮਾਜ ਪ੍ਰਵਾਨ ਕਰੇ, ਮੁਹੱਬਤ ਕਰੇ ਉਹ ਆਮ ਤੋਂ ਖਾਸ ਮਨੁੱਖ ਹੁੰਦਾ ਹੈ। ਨਰਿੰਦਰ ਬੰਗਾ ਦੇ ਮਾਮਲੇ ‘ਚ ਵੀ ਅਜਿਹਾ ਹੀ ਕਿਹਾ ਜਾ ਸਕਦਾ ਹੈ। ਜਿਨ੍ਹਾਂ ਦਾ ਸਿੱਧੇ ਜਾਂ ਅਸਿੱਧੇ ਰੂਪ ‘ਚ ਕਦੇ ਦੂਰਦਰਸ਼ਨ ਨਾਲ ਵਾਹ-ਵਾਸਤਾ ਰਿਹਾ ਹੋਵੇਗਾ ਉਹ ਨਰਿੰਦਰ ਬੰਗਾ ਨੂੰ ਜਾਣਦੇ ਹੀ ਨਹੀਂ ਸਗੋਂ ਦੋਵੇਂ ਬਾਹਾਂ ਖੋਲ੍ਹ ਕੇ ਉਸਨੂੰ ਪਿਆਰ ਵੀ ਕਰਦੇ ਨੇ। ਕਿਉਂ ਕਿ ਕੰਮ ਕਰਨ ਤੇ ਕੰਮ ਆਉਣ ਵਾਲਿਆਂ ਦੇ ਨੇੜੇ ਹੋਣਾ ਸਾਰਿਆਂ ਨੂੰ ਹੀ ਚੰਗਾ ਲਗਦਾ ਹੈ। ਪੇਸ਼ੇ ਵਜੋਂ ਭਾਵੇਂ ਉਹ ਇੰਜਨੀਅਰ ਹੈ ਪਰ ਉਹ ਦੂਜਿਆਂ ਦਾ ਬਣਨ ਵਾਲਾ, ਦੂਜਿਆਂ ਨੂੰ ਬਣਾਉਣ ਵਾਲਾ ਮੁਹੱਬਤ ਦਾ ਵੀ ਇੰਜੀਨੀਅਰ ਹੈ। ਵੱਡੇ ਵੱਡੇ ਕਲਾਕਾਰ, ਗਵੱਈਏ, ਸੰਗੀਤਕਾਰ, ਪ੍ਰਸ਼ਾਸ਼ਨਿਕ ਤੇ ਰਾਜਨੀਤਿਕ ਲੋਕ ਨਰਿੰਦਰ ਬੰਗਾ ਦੀ ਗੂੜ੍ਹੀ ਮੁਹੱਬਤ ‘ਚ ਸ਼ਾਮਲ ਨੇ। ਇਹ ਉਹਦੀ ਵਿਅਕਤੀਗਤ ਸਖਸ਼ੀਅਤ ਉਸਾਰੀ ਦਾ ਸਭ ਤੋਂ ਉੱਤਮ ਨਮੂਨਾ ਹੈ। ਆਪਣੀ 60 ਸਾਲਾਂ ਦੀ ਸਰਕਾਰੀ ਫਰੇਮ ਵਾਲੀ ਨੌਕਰੀ ਮੁਕੰਮਲ ਕਰਕੇ ਉਹ ਅੱਜ 30 ਨਵੰਬਰ ਨੂੰ ਸੇਵਾ ਮੁਕਤ ਹੋ ਰਿਹਾ। ਅਸਲ ਚ ਜ਼ਿੰਦਗੀ ਨੂੰ ਖੁੱਲੇ ਖੁਲਾਸੇ ਤੇ ਖੁੱਲੀ ਆਬੋ-ਹਵਾ ‘ਚ ਛੱਡ ਦੇਣਾ ਇੱਕ ਨੌਕਰੀ ਪੇਸ਼ੇ ਲਈ ਸਭ ਤੋਂ ਖੁਸ਼ੀ ਦਾ ਪਲ ਹੁੰਦਾ ਹੈ। ਹੁਣ ਉਹ ਆਪਣੀ ਮਰਜ਼ੀ ਨਾਲ ਵਿਚਰੇਗਾ, ਹੁਣ ਕੋਈ ਜਲਦੀ ਉੱਠਣ ਦੀ ਕਾਹਲੀ ਨਹੀਂ ਹੋਏਗੀ।  

     1988 ਵਿੱਚ ਉਹ ਬਤੌਰ ਇੰਜੀਨੀਅਰਿੰਗ ਅਸਿਸਟੈਂਟ ਬਰਾਡਕਾਸਟਿੰਗ ਮਨਿਸਟਰੀ ਵਿੱਚ ਭਰਤੀ ਹੋਇਆ ਜੋ ਹੁਣ ਪ੍ਰਸਾਰ ਭਰਤੀ ਦੇ ਨਾਂ ਹੇਠ ਹੈ। ਫਿਰ ਸੀਨੀਅਰ ਇੰਜੀਨੀਅਰਿੰਗ ਅਸਿਸਟੈਂਟ ਬਣਿਆ ਤੇ ਬਤੌਰ ਐਸਿਸਟੈਂਟ ਇੰਜੀਨੀਅਰ ਉਰਫ਼ ਟੈਕਨੀਕਲ ਡਾਇਰੈਕਟਰ ਵਜੋਂ ਦੂਰਦਰਸ਼ਨ ਜਲੰਧਰ ਤੋਂ ਸੇਵਾ ਮੁਕਤ ਹੋਏ। ਗੱਲ ਸਿਰਫ਼ ਉਹਦੀ ਨੌਕਰੀ ਦੀ ਨਹੀਂ ਹੈ, ਦੂਰਦਰਸ਼ਨ ਨਾਲ ਜੁੜੇ ਲੋਕਾਂ ਦੀ ਨਹੀਂ ਹੈ ਬਲਕਿ ਜਿਸ ਸਮਾਜਿਕ ਕਿਰਦਾਰ ਕਰਕੇ ਨਰਿੰਦਰ ਬੰਗਾ ਨੂੰ ਜਾਣਿਆਂ ਜਾਂਦਾ ਹੈ ਉਹਦੇ ਬਾਰੇ ਚਾਰ ਗੱਲਾਂ ਕਰਨੀਆਂ ਵੀ ਬਹੁਤ ਜ਼ਰੂਰੀ ਨੇ। ਅੱਖਾਂ ਦੇ ਕੈਂਪ ਲਾਉਂਣੇ, ਖੂਨਦਾਨ ਕਰਨਾ ਤੇ ਕਰਾਉਣਾਂ, ਵਿਕਲਾਂਗ ਲੋਕਾਂ ਲਈ ਡਾਕਟਰੀ ਸਹਾਇਤਾ, ਸਾਈਕਲ ਪ੍ਰਦਾਨ ਕਰਨੇ, ਪਿੰਡਾਂ ਦੀ ਸਫ਼ਾਈ ਲਈ ਐਨਐਸਐਸ ਕੈਂਪ ਲਾਉਂਣੇ, ਸਿਹਤ ਕੈਂਪ, ਵਿਕਾਸ ਕੈਂਪ ਤੇ ਕਲੱਬਾਂ ਰਾਹੀਂ ਬੱਚਿਆਂ ਨੂੰ ਐਜੂਕੇਸ਼ਨ ਟਰਿਪ ਤੇ ਲਿਜਾਣਾ, ਅੰਗ ਦਾਨ ਕੈਂਪ, ਵਣ ਮਹਾਂਉਤਸਵ, ਨਸ਼ਾ ਛਡਾਊ ਕੈਂਪ ਤੇ ਰੈਲੀਆਂ ਅਤੇ ਨਸ਼ਿਆਂ ਪ੍ਰਤੀ ਜਾਗਰੂਕਤਾ ਲਈ ਪੁਲਿਸ ਪਬਲਿਕ ਮੀਟਿੰਗਾਂ, ਵੱਖ ਵੱਖ ਵਿਸ਼ਿਆਂ ਤੇ ਕੈਂਪ ਅਤੇ ਸੈਮੀਨਾਰ ਕਰਵਾਉਣੇ, ਉਹ ਨਰਿੰਦਰ ਬੰਗਾ ਦੀ ਮੁਢਲੀ ਤੇ ਸਫ਼ਲ ਫ਼ਿਤਰਤ ਦਾ ਹਿੱਸਾ ਰਿਹਾ ਹੈ। ਪਿਛਲੇ ਕਰੀਬ ਸਾਢੇ ਤਿੰਨ ਦਹਾਕਿਆਂ ਤੋਂ ਨੂਰਪੁਰ ‘ਚ ਚੱਲ ਰਿਹਾ ਸਰਦਾਰ ਮੁਹੰਮਦ-ਗੁਲਜ਼ਾਰ ਮੁਹੰਮਦ ਸਲਾਨਾ ਮੇਲਾ ਬੰਗੇ ਦੇ ਨਾਲ ਨਾਲ ਵੀ ਤੁਰਿਆ ਰਿਹਾ ਹੈ। ਕਹਿੰਦੇ ਨੇ ਕਿ ਜਦੋਂ ਕਿਸੇ ਦਾ ਨਿੱਜੀ ਸਮਾਗਮ ਹੋਵੇ ਤੇ ਉਹਦੇ ‘ਚ ਪੁੱਜਦਾ ਕੌਣ ਕੌਣ ਹੈ? ਇਹ ਵੀ ਨਰਿੰਦਰ ਬੰਗੇ ਤੋਂ ਸਿੱਖ ਸਕਦੇ ਹੋ। ਪਤਾ ਨਹੀਂ ਉਹਦੇ ਕੋਲ ਕਿਹੜਾ ਪੈਮਾਨਾ ਆ ਕਿ ਜਿੰਨਾ ਉਹ ਪ੍ਰਸ਼ਾਸ਼ਨਿਕ, ਰਾਜਨੀਤਿਕ ਲੋਕਾਂ ਚ ਵਿਚਰਦਾ ਹੈ ਉਨਾਂ ਹੀ ਸਭਿਆਚਾਰਕ ਲੋਕਾਂ, ਸਮਾਜ ਸੇਵੀ ਸੰਸਥਾਵਾਂ ‘ਚ। ਇੰਨੀ ਕੁ ਉਮਰ ‘ਚ ਉਹ ਕਿਵੇਂ ਸਫ਼ਲਤਾ ਨਾਲ ਰੰਗ ਭਰਦਾ ਹੈ, ਸ਼ਾਇਦ ਇਹੀ ਸਮਝਣਾ ਨਰਿੰਦਰ ਬੰਗਾ ਦੀ ਜ਼ਿੰਦਗੀ ਤੋਂ ਕੁਝ ਸਿੱਖਣ ਦਾ ਮਿਸ਼ਨ ਬਣ ਸਕਦਾ ਹੈ। ਬੰਗਾ ਲਾਗਲੇ ਪਿੰਡ ਖਾਨਪੁਰ ‘ਚ ਉਹ ਮਰਹੂਮ ਪਿਤਾ ਪ੍ਰਕਾਸ਼ ਚੰਦ ਤੇ ਮਾਤਾ ਪ੍ਰਕਾਸ਼ ਕੌਰ ਤੇ ਘਰ ਪੈਦਾ ਹੋਇਆ ਤੇ ਉਹਦਾ ਪੁੱਤਰ ਜਗਦੀਸ਼ ਬੰਗਾ ਇਸ ਵੇਲੇ ਇੰਗਲੈਂਡ ‘ਚ ਸਰਕਾਰੀ ਨੌਕਰੀ ਕਰ ਰਿਹਾ ਹੈ, ਬੇਟੀ ਦਿਵਿਆ ਬੰਗਾ ਕਨੇਡਾ ‘ ਚ ਹੈ ਤੇ ਦੋਵੇਂ ਬੱਚੇ ਆਪਣੇ ਮਾਂ ਬਾਪ ਵਾਂਗ ਸਮਾਜਿਕ ਸੇਵਾਵਾਂ ‘ਚ ਅੱਗੇ ਹਨ। ਹਾਲ ਹੀ ਵਿੱਚ ਨਰਿੰਦਰ ਬੰਗਾ ਦੀ ਧਰਮ ਪਤਨੀ ਕਮਲਜੀਤ ਬੰਗਾ ਜੋ ਬਤੌਰ ਐਸ.ਐਸ. ਮਿਸਟਰਸ ਸਿੱਖਿਆ ਵਿਭਾਗ ਚੋਂ ਸੇਵਾ ਮੁਕਤ ਹੋਏ ਹਨ, ਨਰਿੰਦਰ ਬੰਗਾ ਨੂੰ ਨਰਿੰਦਰ ਬੰਗਾ ਬਣਾ ਕੇ ਰੱਖਣ ‘ਚ ਅਹਿਮ ਭੂਮਿਕਾ ਨਿਭਾਉਂਦੇ ਰਹੇ ਹਨ। ਉਹ ਆਪ ਸਵੀਕਾਰ ਕਰਦਾ ਹੈ ਕਿ ਕਮਲਜੀਤ ਦਾ ਮੇਰੀ ਜ਼ਿੰਦਗੀ ਵਿੱਚ ਬਹੁਤ ਵੱਡਾ ਯੋਗਦਾਨ ਤੇ ਹਿੱਸਾ ਹੈ। ਅੱਜ ਤਕਰੀਬਨ 37 ਸਾਲ ਦੀ ਸੇਵਾ ਤੋਂ ਬਾਅਦ ਉਹ ਸੇਵਾ ਮੁਕਤ ਹੋ ਰਿਹਾ ਹੈ। ਉਹਦੀਆਂ ਸੇਵਾਵਾਂ ਨੂੰ ਯਾਦ ਰੱਖਿਆ ਜਾਵੇਗਾ ਤੇ ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਜਿਵੇਂ ਉਹ ਸਮਾਜਿਕ ਤੌਰ ਤੇ ਵਿਚਰਦਾ ਰਿਹਾ। ਉਹਦਾ ਹੁਣ ਆ ਕੇ ਸਮਾਜ ਨੂੰ ਹੋਰ ਵੀ ਲਾਭ ਹੋਵੇਗਾ। ਚਾਹੇ ਖੇਤਰ ਮੇਲਿਆਂ ਦਾ ਹੋਵੇ ਜਾਂ ਚਾਹੇ ਸਾਹਿਤ, ਖੇਡਾਂ, ਸਮਾਜ, ਧਾਰਮਿਕ, ਵਿਦਿਅਕ, ਖੂਨਦਾਨ ਤੇ ਵਿਕਲਾਂਗ ਲੋਕਾਂ ਪ੍ਰਤੀ ਹਮਦਰਦੀ ਭਰਨ ਦਾ। ਨਰਿੰਦਰ ਬੰਗਾ ਸੱਚੀਂ ਮਹਾਂਨ ਹੈ ਉਹ ਸੋਹਣਾ-ਸੁਨੱਖਾ ਹੈ ਤੇ ਉਹਨੂੰ ਵੇਖ ਕੇ ਲੱਗਦਾ ਨਹੀਂ ਕਿ ਉਹ ਉਮਰ ਦੇ ਇਸ ਦੌਰ ‘ ਚ ਹੈ ਤੇ ਕਈਆਂ ਨੇ ਲੱਗਣਾ ਵੀ ਨਹੀਂ ਹੁੰਦਾ ਕਿਉਂਕਿ ਸਮਾਜਿਕ ਕਾਰਜ ਤੁਹਾਨੂੰ ਬੁੱਢਾ ਹੋਣ ਹੀ ਨਹੀਂ ਦਿੰਦੇ। ਨਰਿੰਦਰ ਬੰਗਾ ਲਈ ਸ਼ੁਭਕਾਮਨਾਵਾਂ ਨੇ ਅਤੇ ਜਲੰਧਰ ਦੂਰਦਰਸ਼ਨ ਲਈ ਉਹਦੀਆਂ ਸੇਵਾਵਾਂ ਹਮੇਸ਼ਾ ਸਲਾਹੀਆਂ ਜਾਂਦੀਆਂ ਰਹਿਣਗੀਆਂ। ਆਸ ਕਰਾਂਗੇ ਕਿ ਸਮਾਜ ਪ੍ਰਤੀ ਉਹ ਆਪਣੀਆਂ ਵਿਸ਼ਾਲ ਸੇਵਾਵਾਂ ਦਾ ਘੇਰਾ ਹੋਰ ਵੀ ਵੱਡਾ ਕਰੇਗਾ ਤਾਂ ਕਿ ਇਹਨਾਂ ਰਾਹਾਂ ਤੇ ਚੱਲ ਕੇ ਕਈਆਂ ਦਾ ਜੀਵਨ ਮਿਸ਼ਨ ਸਹੀ ਦਿਸ਼ਾ ਵੱਲ ਤੁਰ ਸਕੇ।